Cerdek Jawa Banten Umiyati | Telung Wengi ning Hotel

Cerdek Umiyati

Wenten salah sios guru utusan saking sekolahan SMP Cilegon, ayun milet acare bimbingan teknis pengajar utama SMP, tempate ning hotel Serang, namine Ibu Lisa, guru niku uwonge wedosan. 

Persiapan kangge linggar ning hotel niku segale-gale dibaktani kados dedaharan cemilan, sepertos cokolatos, keripik dangder pedes, reroten lan dedaharan bocah alit sing namine Siip, niku dibakte sedanten.

Awal mula keberangkatan Ibu Lisa dianter sereng rayate sampe simpang, seterase di pesenaken mobil Maxim sampe hotel. Ibu Lisa ning perjalanan ngenda screenshoot bukti pembayaran ning Mamang Maxim.

“Mang, kule ayun ngende bukti pembayaran Maxim, bangkit boten?” cepe Bu Lisa.

"Bangkit Bu, tapi mengkin yah namun sampun nyampe,” cepe Mamang Maxim.

Seterase nyampe, HP Mamang Maxim malah lowbet lan mati

“Mang pundi bukti pembayarane.”

“Duh, ampurane Bu, HP kulane mati. Wau kulane nyetel lagu boten kelingan lamun baterene tinggal semit.”

“Oh, yowislah tak screenshoot dewek be.” 

“Enggih Bu, ampurane ya.”

Medal saking mobil Maxim, Ibu Lisa langsung ngisi registrasi ning lantai kalih sereng rencang-rencang sing laine. Ibu Lisa  diisungi uning nomor kamare niku sepuluh limalas, lan bahwa kuncine niku sampun di bakte sereng batur sekamare namine Ibu Lail. Ibu Lisa ngilari Ibu Lail tapi boten gegemboran. Naken ning bature sing lagi linggih ning bebancik jaba pinggir lawang, cepene lagi nenggeni mobil antar-jemput kamar. 

“Bu, punten, uning sing namine Ibu Lail, sing pundi niku ya?”

“Kule Ibu Lail, nomor kamar kule sepuluh limalas," cepe Ibu Lail.

“Aih pas amat Bu, sereng kule berarti sekamare, kule diisungi uning nomor kamare sepuluh limalas,” cepe Bu Lisa.

Semenjak niku, ibu guru kalih niku mulai kenalan ngobrol sampe manek mobil anter-jemput geh dedempetan. Nyampe adep kamar sing ngebuka niku Ibu Lail. Ibu Lail ngebuke lawang sampe ngeblak wayah magrib pisan, Ibu Lisa mulai ngerasa aneh hawa kamar niku kados sunyi lan ngedamel merinding. 

Ibu lail ngucapaken salam sembari ngelebet ning jero kamar “Assalamu’alaina wa’ala ibadillahissholihin.”

Disusul sereng Ibu Lisa “Assalamu’alaina wa’ala ibadillahissholihin.”

Seterase Ibu Lail langsung mendet banyu wudu kangge salat magrib.

Ibu Lisa nyusul wudu lan ngilari arah kiblat, rupane boten nemu arah kiblate.

“Wis sih ngadep ning endi bae, sing pentingmah ngadep ning gusti Allah,” cepe Ibu Lail.

Akhire Ibu Lisa ngadep tembok pinggir kasur, lan Ibu Lail ngadep tembok pinggir kasur sebelahe niku kamar adus. Saking atise Ibu Lail pengen pindah, mengkin namun salat malih ayun salat ning tempate Bu Lisa, ngenda tukeran soale atis jerehe.

Sesampune nerima materi ke sios, Ibu Lisa lan Ibu Lail mantuk ning kamar malih jam setengah sepuluh sipeng, nyampe adep kamar, kuncine di kantong sereng Ibu Lisa, pas dibuke boten bangkit kebuke lawange, lami boten bangkit manjing. Akhire ngenda tulung ning Mamang Supir.

“Mang ende tulung kule kih lawange boten bangkit kebuke,” Cepe Ibu Lail.

“Nggih sih Bu, pundi kuncine,” cepe Mamang Supir.

Seterase diisungilah kunci niku saking Ibu Lisa  ning Mamang Supir. pPinten-pinten balen dibukakaken sereng kunci niku tetep boten bangkit. 

“Biasanemah bangkit niki Bu, kadosemah niki keni radiasi HP niki, dados kartune niki boten bangkit ngebuka lawang. Niki kula bukakaken kerihin sereng kunci pribadi kule, mengkin di gantos sing baru nggih Bu.”

Akhire Ibu Lisa lan Ibu Lail manjing ning jero jam sepuluh sipeng. Seterase Ibu Lail pengen nonton tipi. Pas nyetel ning kamar, tipi ruang tamu tandang-tandang urip, Ibu Lisa langsung jelingkat sing wau lagi selonjoran.

“aAstagfirulloh Bu ... peripun niki galih tipi ruang tamu urip dewek.”

Ibu lail langsung jelingkat peparekan sereng Bu Lisa. 

“Nggih Bu, padahal remote masing-masing, wis Bu sareh saos yuk, sampun sipeng.”

Seterase Ibu Lail pengen nyiliki volume AC. 

“Bu Lisa, kule ciliki volume AC nggih.”

“Nggih sih Bu katuran,” cepe Bu Lisa.

Ibu lail akhire nyiliki volume AC sing waune selawe, dados telung puluh. Masing-masing ibu guru sampun ning tempat sareh lan ningali HP masing-masing. 

Wenten semenit volume AC balik malih ning angka selawe, Ibu Lail ngerasa atis kebina-bina, lan tetaken ning Ibu Lisa.

“Digedeni malih tah AC ne niku?”

Ibu lisa langsung jawab sembari ngerangkul Bu Lail, “Boten Bu, kulemah boten pernah nyekel remot AC”.

Sewengi niku suasana ning kamar sepuluh limalas nambah mencekam, guru kalih niku boten bangkit sareh, merem melek wong kalihan.

Seterase sekitaran jam siosan wenten suara ting nong... ting nong....

Guru kalih niku gegederan, masing-masing nyenyebut “Asyhadu alla ilaaha illallah wa asyahadu anna muhammadarrosulullah,”. 

Ibu lail boten bangkit sareh sampe subuh, antanapi Ibu Lisa turu-turu ayam.

Jam tengah enem bu lail tangi langsung mendet banyu wudu salat subuh. Disusul Ibu Lisa melayu-melayu pengen nguyuh. Sesampune nguyuh, Ibu Lisa ningali ning jero kloset, banyune warna ireng, langsung jejeritan nyeluk Bu Lail, “Bu, Ibu... niki banyu kloset ko warnane ireng.”

“Nggih tah? Wau kula ningalimah boten, maler warna bening.”

“Wedos amat yah Bu kulane,” cepe Bu Lisa.

“Wis sing inget bae ning gusti Allah, mugi-mugi Allah ngejage.”

Bengi sing terakhir niku bengi ke telu, tibe-tibe Bu lail ning ruang tamu, cepe bu lail “kadosemah tipi ruang tamu niki pengen disetel.”

“Nggih tah Bu?” cepe Bu Lisa.

Seterase Bu Lisa sereng Bu Lail nonton tipi, tibe-tibe foto golek ning tembok rigel, brug!

Langsung kaget ngegeder-geder ibu guru kalih niku. Akhire Ibu Lisa mutusaken foto golek niku dipendet lan dibuang ning jaba, ning tong sampah. Lan sesampune niku, bu guru kalih niku sesarehan ning kasur, tibe-tibe Bu Lail ningali foto golek niku sampun nempel malih ning tempate. Seterase Bu Lail sereng Bu Lisa ngebuang ning dalanan.

Sesampune niku ditutup lawange, seterase rawuh si Mamang Mobil Antar-jemput, “kedebeg… kedebeg… kedebeg ting nong-ting nong”. Bu Lisa lan Bu Lail medal keringet atis, saking wedine, kinten-kinten sinten sing mencet bel.

Wong kalihan ngewanikaken ngebuka lawang, ternyata niku Mamang Antar-jemput kamar, langsung lega ati guru kalih niku. 

“Bu punten foto golek niki napik dibuang nggih, niki sing derebe bos gede hotel niki, uwonge sampun ninggal.”

“Oh nggih ari kotenmah tak pasang malih,” cepe Bu Lisa lan Bu Lail.

Pas bebalik linggar saking tempat mamang niku langsung ngilang, ternyata mamang niku arwah bos gede hotel niku.

________

Penulis

Umiyati, S.Sy., guru SMP Uswatun Hasanah Cilegon.

Kirim naskah

redaksingewiyak@gmail.com

Cerdek Jawa Banten Muhammad Sukma | Wadon Angel

Cerdek Muhammad Sukma 

Sar’ah niku wong wadon sing ayu perawakane, ayu kepribadiane, lan pinter malih uwonge. Katah lanang sing demen, dados kembang sekolah waktos niku.

Sarip niku salah sios sing demen saking Sar’ah. Katah usahe lan lakone kangge pripun carane didemeni sereng Sar’ah, salah sios lakone ngge surat.

“Antuk kula mendet buku wong kono boten?” cepe Sarip.

“Ayun ngge napa”? cepe Sar’ah.

“Boten nape–nape, ayun ngimbali tugas wau,” cepe Sarip.

“Oh, nggih sih,” cepe Sar’ah.

Sesampune diisungi sereng Sar’ah, Sarip pura – pura ngimbali tugas puniku, atanapi Sarip dede ngimbali tugas, malahan nulis kata-kata kangge nyatakaken perasaane Ning Sar'ah. Kata-kata niku ditulis ning lembar akhir buku Sar’ah.

Semenjak mata kula ningali wong kono, terasa waktos niki bergerak elon pisan. Ambekan kula serasa sek-sekan, jantung kula deg-degane boten kekontrol. Sebenere kula boten bangkit ngomong meketen, anatapi semakin ditunda semakin boten ketahan. Dados kula bangkitaken ngomong, KULA DEMEN SERENG WONG KONO, ayun boten wong kono dados pacar kula?

Mekoten kata-kata sing ditulis Sarip saking buku Sar’ah.

Seminggu kemudian antuk balesan sing ditenggen-tenggeni sereng Sarip. Melalui buku Sarip sing dipendet sereng Sar’ah.

“Ampura sederenge Sarip. Kula dede boten ayun, anatapi kula seniki boten ayun pacaran krihin. Kaula ayun fokus belajar krihin, mudah-mudahan sarip ngertos sereng putusan sing kula embil.”

Sesampune balesan sing Sar’ah nyampe, ati Sarip serasa boten kepireng deg-degane. Ambekane serasa Senin-Kemis. Dunia niki serasa boten bergerak malih.

Tiap dinten, tiap minggu, Sarip boten napsu napa-napa. Dahar boten napsu, memengan geh boten antuk.

Tiap Dinten Sarip lakoni urip kelawan perasaan hambar. Walaupun katah baturane sing ayun nyoba ngehibur, dekane tetep boten terhibur.

Sarip galau.

“Kelipun Sar’ah boten antuk sereng kula, ape kula boten pinter? Apa perawakan kula kurang elok ditingali? Apa kula boten pantes kelawan dekane?”

Mekoten kata-kata sing wenten ning pikirane Sarip.

Akhire setahun sampun kelewat, Sarip lan Sar’ah sampun naik kelas rolas SMA.

Sarip ngewanikaken malih nyatakaken perasaan maring Sar’ah, anatapi carane beda sereng sing dilakoni tahun sengen, sarip nyatakaken perasaane secara langsung.

Sesampune nenggeni setahun, Sar’ah ayun dados pacare Sarip.

Sing waune sarip males-malesan belajar, sering bolos sekola, manjing sekola telat bae, satus wolung puluh derajat berubah. Dados rajin belajare, rajin manjing kelase, gelem ngerjakaken tugas-tugase, sekolah niku terasa indah. Bagi sarip waktos niku.

Sampe tiba waktos perpisahan sekole.

Tiba-tiba Sar’ah ngomong ayun ngakhiri hubungane.

“Sarip, ampura yah, kayane hubungan kita niki boten bangkit dilanjutaken,” cepe Sar’ah.

“Kelipun geh? Wenten napa?” cepe Sarip.

“Percuma diterusaken geh, soale kita terbentur kelawan jarak, mengkin komunikasi ne bakalan angel,” cepe Sar’ah.

Sarip boten bangkit ngomong napa-napa.

Sesampune Sar’ah ngomong mekoten, perasaan Sarip boten karuan.

“Kelipun geh pada saat bahagia acara perpisahan sekole, malah dados waktos perpisahan ngge kita, kite bener-bener demen kelawan deweke, malah dadose meketen, lara ati niki,” Sarip ngomong ning jero ati.

Seminggu kemudian Sarip kepetuk sereng batur pareke Sar’ah, dina kasihe.

“Rip, Sarip, ayun ngobrol sih, sibuk boten?” cepe Dina.

“Nggih sih, ayun ngobrol napa?” cepe Sarip.

“Wong kono boten di undang tah sereng sar’ah?” cepe Dina.

“Boten, wenten acara napa?” cepe Sarip.

“Aiih, Sar’ah kan lagi nikah,” cepe Dina.

“Hah?!" Sarip terkejut.

“Iya, cepene semenjak kelas sios sampun dijodohaken sereng wong tuane,” cepe Dina.

Sesampune ngobrol sereng Dina batur pareke Sar’ah, katah sing dipikiraken Sarip.

Sengen sewaktu Sar’ah nolak Sarip, ternyata Sar’ah niku sampun dijodohaken.

"Angel temen mahami wong wadon," cepe Sarip.

______

Penulis

Muhammad Sukma, guru SMP Al-Khairiyah Cilegon.

Kirim naskah

redaksingewiyak@gmail.com

Cerdek Jawa Banten Elis Ulfah | Kembang Tembelek

Cerdek Elis Ulfah

Lamun waktose usim udan, Jubedah sereng batur-bature niku kepengene dedolan ning tegal. Kerane kepengen memengan bebecekan, kebeneran dinten niki sing wau isuk sampe waktos asar, udan boten mari-mari.

Dados kesempetan Jubedah kangge memengan bebecekan. Waktos mantuk sekole madrasah, Jubedah boten langsung mantuk ning griye, malahan ayun linggar ning tegal. Jubedah ngajak-ngajaki bebaturane.

 

”Nah... Onah... merene geh dipit sedele,” Jubedah cecelukan Bahronah.

”Ane ape sih Bed gegerowokan bae," jawab Bahronah sembari nyilek ning buri. 

"Nah, aje balik. Dolan dipit yuk ning tegale Mang Karim. Teger los geh tes udan mengkenen mah," cepe Jubedah.

“Iye wis. Tapi, ajak geh Marwatine endah rame. Engko ning tegale mengan bentengan yah. Sing keleh engko ditimpugi karo kembang tembelek," cepe Bahronah. 

“Iye wis, yuk!” jawab Jubedah.

Jubedah lan Bahronah ngajak Marwati, langsung linggar ning tegale Mang Karim. Sesampene ning tegal, udan masih ngericik.

Ketelune dedolan ning tegale mang Karim sing tes dipaneni kacang keduk. Ning tegale Mang Karim katah kembang tembelek sing cukul.

Laju Jubedah lan bebaturane langsung dedolan bentengan, pepelayon merika-meriki sembari tetimpugan kembang tembelek. Boten kerase sampun ayun magrib. Marwati ngingetaken Bahronah lan Jubedah. 

“Nah, Bed, Balik yuk, wis arep magrib. Bokan kitene disewoti emak kite," cepe Marwati. 

“Aih iye, ore kerase arep magrib bae. Yuk Nah, balik," jawab Jubedahe sembari ngerangkul bahu sekaro bature.

Seketelune mantuk melaku reruntungan. Kelambi lan badane kekucut teles lan mambu kembang tembelek entas mau tetimpugan. Sampe ujung lelurung Jubedah lan batur-bature mencar balik ning geriye pedewek-dewek.

Sesampene ning griye, emake Onah sampun ngadeg ning arep lawang sembari nyekel sesapu tugel. Merongos. 

“Gancang sire Nah, merene! Tak serimpung sire yah! Balik sekole udu langsung ning umah, malahan dedolan dipit. Lake gawene sire kuen yah! Wismah badan kekucut teles, mambu wangur tembelek maning yah!” emake Onah ngerewek ning jabe umah.

”Iye Mak, ampun!” jawab Onah sembari melayu manjing sing lawang pawon. Bahronah langsung ning sumur langsung adus ngebersihi badane.

Sesampune salat Magrib lan dahar sipeng, bahronah linggar ngaji ning griyane Ustaz Fachmi. Ning riku kepetuk Jubedah lan Maryati. Bahronah cerite ning bature lamun deweke disewoti emake. 

"Untung kite ore sampe diserimpung ning emak. Lamun kite diserimpungmah, sire wong roro tanggung jawab yeh!" cepe Maryati.

“Ngeladeni!“ jawab Jubedah sembari ngekek. Sekabehe pading ngekek.

________

Penulis

Elis Ulfah, S.Pd., guru SMP Negeri 2 Cilegon.

Kirim naskah

redaksingewiyak@gmail.com 

Cerdek Jawa Banten Siti Fatimah | Nikmat sing Diembil Gusti Allah

Cerdek Siti Fatimah

 Sembarang cilik sampe kuliah Jamsiah urip dadi wong ayu ning Kota Serang. Uwonge etes. Sekolane ulih rengking siji bae, dadi kebanggaan guru lan wong tue. Jamsiah gawe berag wong tue kerane prestasine. Saiki wis gede, wis megawe. Tiap arep lunge megawe, Jamsiah ngelamun bae kepengenan due laki sing sejen kota, jerehe pengen ngerasakaken mudik. 

“Kite pengen lamun engko kawin due laki dudu wong Serang.  Gusti Pengeran, pengen rasane bolak-balik ning umah mertua iku,” Jamsiah ngomong dewek. Setiap pengen kawin, Jamsiah ngelamun ngebayangaken due laki sing adoh.  

“Jamsiah, subuh-subuh apik ngelamun bae sire kuen!” Ibu nyentak Jamsiah sing lagi ngelamun ning arep umah. Jamsiah kaget ngejelengkat, mesem-mesem, sembari ngembil anduk arep siap-siap megawe.

Jamsiah damele ning sekolahan, dadi guru. Guru prigel, masih enom, tapi kuru badane, jereh uwong mah badan ideal wadon. Tapi anehe, deweke tiap dipareki wong lanang, lake sing bener-bener arep ngawini, gagal bae. Sampe-sampe bebaturane pating khawatir ning Jamsiah, laju ngenalaken ning akeh lanang. Arane wong Serang, pating ngajaki ning dukun atawa ning wong pinter.

“Jamsiah, sire arep ning Abah Haji ore? Yuklah marani! Sire kuen endah cepet ulih jodoh,” jereh Uum, bature Jamsiah.

“Wis, Um, apiklah. Ane-ane bae sire mah ngajaki kite ning Abah Haji. Lagian lamun durung jodohe mah, ye gati, primen,” Jamsiah nyamber omongan bature.

Umur wis pas, kuliah uwis beres, ngajar uwis enak, ape maning sing digelati. Jamsiah terus kepikiran jodoh bae tiap dine sebenere. Deleng baturan wis pating kawin, ulih jodoh sing bagus-bagus, pegawean enak-enak. Ane perasaan iri. 

Wis sue Jamsiah mikir. Akhire gelem diajak bature ning Abah Haji gonah ngejaluk doe enteng jodoh. Sing Abah Haji kuen, Jamsiah dinean akeh amalan. Tapi pas warah ning wong tue, ibune marah ning Jamsiah. Sembari marah, ibune nean nasehat gonah Jamsiah sing lagi nangis mikiri nasibe. 

“Jamsiah, sing arane jodoh mah wis ditulisi karo Gusti Allah. Menuse mah cuma bise usahe karo ngedoe. Jodoh ning tangan Allah, lamun durung kependak jodohe, ye gati. Sabar bae, syukur apik ore kelingan,” Ibu sembari ngelus-ngelus Jamsiah.

Jamsiah akhire nurut ning wong tue. Lagi meneng bae ning tempat adem, eh kependak lanang kuasep. Lanang kuen bature Uum, sengaje arep dikenalaken karo Jamsiah. Sing kabeh doe Jamsinah, ane ning lanang kuasep iku. Lanang soleh, ore ngerokok, pinter, dudu wong Serang, anak kiai maning. Wis kien impiane Jamsiah.

“Alhamdulillah, Jamsiah, sirane wis sabar, makane ulih lanang sing mengkonon,” jereh Uum. 

Saking berage Jamsiah, sewise kawin pengen due anak sing akeh. Jamsiah karo lakine wis kaye pasangan ning tipi-tipi, romantis, cocok kuasep lan ayu. Tapi setaun, rong taun, telung taun, sampe sepuluh taun. Jamsiah karo lakine durung dinean keturunan. Wis akeh usaha gonah pengen due anak.

Jamsiah lan lakine tetep sabar nonggoni anak. Sing penting mah urip berag, rukun karo laki, dinean sehat, anak mah bonus. Setiap dine Jamsiah nean pikiran positip mengkonon bae ning pikirane. Sing sepuluh ngimpi, sing dikabulaken karo Allah, pasti nane siji loro nikmat sing diembil. 

“Jamsiah, wis sing sabar bae. Urip mah akeh ujiane. Sing penting sire kuen apik duwe pikiran ape-ape ning Gusti Allah. Ibu mah ore pengen nuntut akeh ning sire, sing penting sire sehat lan bahagia bae rumah tanggane,” jereh Ibu. 

Jamsiah sembari nangis, bersyukur ulih wong tue karo laki sing atine adem. Ibu lan anak kien nangis sekarone ning arep umah sore-sore. 

________

Penulis

Siti Fatimah, M.Pd., guru SMPN 1 Kosambi Kab. Tangerang.

Kirim naskah

redaksingewiyak@gmail.com 

Cerdek Jawa Banten Diki Setiabudi | Urip Loman Ngegawa Berkah

Cerdek Diki Setiabudi 

Bengi kien cuacane mendung lan peteng. Persis kaye Sakim sing lagi murung ning amben bari nyekel sapu sade. Sakim, pemude saking Ciwuni dikenal bocah nurut ning emake. Sedine-dine, Sakim ngentekena waktu ngerawat emake sing geringan-geringan seentas abahe nilar dunia limang wulan ning buri.

Emake lumpuh teturon bae entas tibe ning pawon waktos ngangkati kayu gonah masak sedine-dine. Semenjak iku, emake teturon bae ning kamar. Sakim, anak siji-sijine sing urip lantaran kakange nilar dunia kena penyakit polio lagi cilik, ditambah penyakit panas lan ora due biaya bakal berobat, sampe kakange Sakim ninggal ora ketulung.

Ora kerase Sakim umure wis 24 tahun, tapi badane cilik kedelenge kaya umur sing masih 15 tahun. Akune jereh uwong saiki meh akibat ‘stunting’ alias gizi buruk. Sakim ngelamun bari inget kejadian deweke tas dihina Mang Kodir. Siji mangse, Sakim inget pisan pas lagi melaku ning dermage seentas ngangkuti kayu. 

Deweke ningali Markonah, anake Mang Kodir tibe lan ngejengking ning dedalan lantaran sepedahe ngejungkir. Bari nangis lan ngejaluk tulung ning Sakim. 

“Nong Markonah klimen ikune?”

“Aduh lare Kang Sakim. Kitane tas tibe lantaran ban arep sepedahe nerajang watu. Haduuh….” jereh Markonah kelaranen.

“Yuk dibantu tangine. Kin dianter ning umah enong enda diobati,” jereh Sakim bari ngedokon kayu gegawaane, terus Sakim ngebantoni Markonah ngadeg lan sepedahe, laju dianter ning umahe langsung. Sakim memang pemude sing baik lan loman najan wong ore due galah. Keadaan urip susah ore ngalangi bakal jiwa sedekahe lan ngebantu uwong miskin sing lebih susah sing deweke.

Setekane Sakim nganter ning umah Markonah., setekange ning kane, laju nongol bae Mang Kodir bapane Markonah metu bari ngucap kalimat sing ora disangka-sangka.

“Wih ane ape kih si Boncel iki lan anak kite? Anak kita Markonah tas diapakaken Cel!”

Jereh Mang Kodir bari tolak pinggang lan rade ore terime kedelenge.

Sakim kaget, teruse Markonah ngejelasaken.

“Abah aje laju muring bae geh, iki kang Sakim tas nulungi enong mau. Nong tibe sing sepedah, untung ana kang Sakim.”

 

“Wis manjing bae sirane. Si Sakim meh uwong ora due lan susah! Aje dipareki bokan nular kesusahe,” jereh Mang Kodir.

Ngerase harga dirine direndahaken, Sakim langsung ngejawab.

“Mang aje konon geh. Kite meh ikhlas nulungi Markonah, tapi lamun Mamang ngehina kaye konon kite meh permisi bae. Assalamualaikum ….”

Sakim langsung lunge kelawan ati sedih lantaran ngerase direndahaken ning Mang Kodir. Jadi ternyate iku sing jadi sebab Sakim ngelamun bae ning amben.

Banu ore disadari, kerungu ana sing ngucap salam. Sakim kaget lantaran sing ngucap salam iki suarane kaye Pak Haji Adun, uwong dikenal sing paling sugih ning kampunge. 

“Assalamualaikum… Sakim.” 

“Waalaikusalam, enggih Pak Haji mengkin....”

Jereh Sakim bari gasik arep ngebukakaken lawang umahe.

”Iye ding Sakim,” jerah Haji Adun.

”Meriki Pak Haji, katuran…” jereh Sakim bari ngebuka lawang.

“Kim, kulane merene kih arep ngegai picis bakal berobat emak nire ning Rumah Sakit Siloam Jakarta. Emak nirane kan endah cepet pulih,” jawab Haji Adun.

Sakim kaget lantaran deweke weruh yen Rumah Sakit Siloam Jakarta mah jerehe pade ngomong larang biayane.

“Kulane mimpi seentas solat, endah sempurna ibadah kih kon sodaqoh ning wong gering sing ngebutuhaken, tapi sirane aje kesinggung ye. Pak Haji jadi inget ning emak nire Sakim. Okon aje nolak, soale kulane wis nazar.”

“Enggih Pak Haji hatur nuhun. Kule mah boten nolak kebaikan Pak Haji.”

“Ye wis, kulane engko sore berangkate.”

“Alhamdulillah ya Allah. Allahu Akbar!” Sakim ucap syukur lan takbir.

Sakim atine jembar lan langsung inget bae ning omongan guru ngajine. Lamun uwong sing sabar lan ikhlas apa maning bari loman meh pasti bakal ulih pitulung sing ore disangke-sangke. 

________

Penulis

Diki Setiabudi, S.Pd., guru SMP Negeri 27 Kota Serang.

Kirim naskah

redaksingewiyak@gmail.com 

Cerdek Jawa Banten Dede Quratul'aini | Doa sing Diijabah

Cerdek Dede Quratul’aini

Samsuri lan Mabruroh sampun lawas kepengenan derebe pecil. Sampun pitung tahun nonggoni sang buah hati. Unggal dinten ngedoa ning Gusti Allah. Samsuri lan rayate niku setiap dinten ngedamel supados boten kepikrian saos. Sing gawe ngerunyakaken lamun Mabruroh ketemu atanapi ditakeni sereng tetangge lan dulur-dulure.

”Mab, sampun derebe pecil?”

”Mab, sampun meteng?” 

”Mab, sue amat duwe anake!”

Kerane sering ulih pertakonan niku, Mabruroh kadang milih meneng saos. Tapi ning jero atimah luare.

”Emange pecil niku sinten sing ngenei lamun dudu sing Gusti Allah,” cepe Mabruroh ning jero ati.

Lamun kependak Samsuri, Mabruroh pasti langsung ngadu lan wewarah, bahkan sampe nangis saking larane diomong niku. 

”Wis endahaken bae Nong lamun ane uwong ngomongmah. Emang uwong ikumah ore bise ngerasakaken ati kite. Napik dipirengi malih,” cepe Samsuri. 

Akhire lamun wenten sing tetaken, Samsuri sing ngejawab, “Jaluk doane saos.”

Wenten saos dulur-dulur atanapi batur sing maler ngemotivasi Samsuri lan Mabruroh supados tetep semanget kengge ikhtiar lan ngedoa. Ning perjalanan niku katah sing dilakoni Samsuri lan Mabruroh, baik ning medis atanapi ning tempat herbal. 

”Cobe ngejajal ziarah ning Gunung Karang, Sam,” cepe bature Samsuri, si Komar.

”Kang, kok ayun derebe pecil kudu ning Gunung Karang? Emange wenten nape ning rikune?” Samsuri tetaken. 

“Mase iye kudu merane. Nape hubungane. Boten manjing akal. Percaye ore percaye,” Mabruroh ugah milet ketelimbeng. 

“Enggih, wenten dulur kulegah sing berhasil derebe pecil sewise manek Gunung Karang,” cepe Komar malih. 

Kerane keisengan lan terkena bujuk rayu si Komar, Samsuri ngajak rayate berangkat.

”Yuk, Nong, ngejajal sembari dedolan,” cepek Samsuri.

Mabruroh nurut bae ning lakine, embuh kaye wong ore sadar. Samsuri lan Mabruroh linggar ngebakte motor. Sembari tetaken ning uwong-uwong sing dilewati, Samsuri lan lakine dalan ngelewati gunung lan makam, gawe ati maras lan wedi. 

Samsuri lan Mabruroh nyampe ning tempat ziarah niku. Mabruroh dipendet kangge nyekel watu sembari dirangkul sing buri. Cepene lamun nyampe, bakal derebe pecil. 

“Ape iyane,” ning jero ati Mabruroh percaye ore percaye. 

Samsuri ugah bingung, kelipun nuruti omongan bature sing boten manjing akal niku. Boten lami, Samsuri lan Mabruroh nyadari kesalahane. Sekarone jaluk ampun ning Gusti Allah. Samsuri lan Mabruroh kepireng, lamun doe sing paling diijabah enggih pun niku doane wong tue.

________

Penulis

Dede Quratul’aini, guru SDN Kubang Sepat II, Kec. Citangkil, Kota Cilegon.

Kirim naskah 

redaksingewiyak@gmail.com 

Cerdek Jawa Banten Encep Abdullah | Bêlêdogan si Rojali

Cerdek Encep Abdullah

Rojali mêlipir-mêlipir mêtu sing kamar. Ning tangané nyêkêl kêrék lan lilin. Rumasê wêruh lamun ibuné bakal ngêmarahi. Rojali pintêr, ngajak adiné mêtu, si Rosyid.

“Gagi, mumpung ibuné lagi adus,” jéréh Rojali ning si Rosyid sêmbari narik tangané.

Sekaroné metu sing umah boncéngan nunggang pit. Kêluyuran gêlati wong raméan sing nyulêd bêlêdogan. Rojali ngêlogok kantong. Picisé akéh. Anê sékêt éwu. 

“Kang, picis sing êndi?” jéréh Rosyid.

”Wis ajê akéh têtakon. Yuk, tuku bêlêdogan!” jéréh Rojali.

Rojali lan Rosyid borong bêlêdogan. Jênis apê baé dituku. Rumasê akéh picis. Rojali lan Rosyid pêpolah aduan bêlêdogan. Sulêd siji, sulêd maning. Untal-untalan. Aduan kêlawan bêbaturané. 

Bêlêdogane Rojali orê sêngajê manjing jêro kêlambi Duloh. Si Duloh gêgidig sembari melayu-mêlayu. Duaaar! Bêlêdogan kêréké mêlêdog. Rojali lan Rosyid ngiprit balik. Pit ditinggal ning latar. 

Bapané Rojali balik salat Mêgrib. Cêlingak-cêlinguk ngêdêlêng bocah rêraméan ning latar, bokan anê anaké sing mélu keluyuran. Bapané Rojali ngêdêlêng si Duloh ngêlépoh.

”Rojaliii ... Rojaliii ...,” jéréh Duloh nangis kêjêr sêmbari tangané nuding-nuding ning arahé Rojali kabur. Tapi bapané Rojali orê ngêdêlêng ulês anaké. 

Balik ning umah, bapané Rojali cumê ngêdêlêng rabiné lagi salat.

“Kêlipén Bah, kayê wong kêtêlimbêng?” takon ibuné Rojali sewisé salat.

”Bocah-bocah salat Mêgrib orê?” jéréh bapané Rojali.

“Darani mélu Abah ning mêsjid.”

Rojali lan Rosyid ngêgêtêr-gêtêr ngêrungu obrolan Abah lan Emak ning kamar. Kêringêt ngêngotos ning pawon. Mêjogrog sekaroné ning pinggir pulkas.

”Wis orê salat, maén bêlêdogan maning. Êndi bocah kaên. Tak sunat pisan sekaroné!”

Rojali lan Rosyid nyangkin orê puguh. Nyangkin ngêringêt. Kotos. Baranganu, orê sengajê sikil Rosyid nyênggol lemari kacê. 

”Ssst! Ajê beribin,” jéréh Rojali ning Rosyid. 

***

”Assalamualaikuuum ...! Assalamualaikuuum ...! Kamaad anak irê kéh pêpolah. Lakê kêrunyané ning sing si Duloh. Masê gêgêré sampé abuh menyor mêngkénén!” 

Ibuné Rojali ngêbuka lawang. Bapané nyusul ning buri. 

“Wéntên napê Kang Komar mêgrib-mêgrib têriwuh iku!” jéréh ibuné Rojali.

“Anaké kuh, têlêngês. Dêlêng gah gigir anak kitê sampé mêngkénén. Jéréhé kênang bêlêdogan si Rojali. Pokoné orê têrimê kitané. Kudu tanggung jawab bocah ikê,” jéréh Duloh.

“Astagfirullah. Orê ning sêkolahan, orê ning perumahan. Padê baé polahé. Ning sêkolahan nyulêd bêlêdogan. Ning kéné padê baé,” jéréh Kamad.

”Wingi gah kitê lagi masak jêring, si Rojali nyulêd bêlêdogan ning kéncéng. Gusti Pêngéran. Lah, awur-awuran sêjagat!”

Kamad lan rabiné kêtêlimbêng. Ajê maning wong liyan, sêkaroné gah dadi korban anaké. Anaké sêkaroné lagi ngénté alon-alon sing hordéng sêmbari ngêgêtêr-gêtêr tangané.

”Wis pokoné ko ésuk marêk baé ning umah kitê. Kudu tanggung jawab. Saiki kitané arêp gawê Duloh berobat dipit,” jéréh Komar.

Pas manjing umah, Kamad ngêdêlêng sêkaro anaké. Arêp kabur malah kêcêkêl. Ibuné ngejéwér kuping Rojali. 

”Apané kitê doang iku. Rosyid gah péluan!” jéréh Rojali orê gêlêm dihukum déwékan. Sekaroné dijéwér. Bêlêdêgon ning kantong Rojali dirampas bapané. Dipindahakên ning celanê déwéké ning kamar. Barang ngêlogok kantong, picisé ane sing ilang sékêt éwu.

”Bu, ngêmbil picis Abah orê?” takon Kamad.

“Lah êmbuh. Botên uning Bah,” jéréh rabiné Kamad.

Matê Kamad lan rabiné langsung mêlotot. Anaké ngêtungkul ngêrasê salah.

”Aih, Gusti Pêngéran! Abah lan Ibu orê élok ngêgéi contoh nyulêd bêlêdogan asal. Orê élok ngajari sirê-sirê nyolong picis. Oré élok ngajari bolos salat,” jéréh Kamad.

”Kitêmah orê salah, Bah. Kang Rojali sing maksê kitê kon ngêbaturi nyulêd bêlêdogan!” jéréh Rosyid.

”Wis, padê baé. Naséhat Abah iku gonah sirê segalê,” jéréh ibuné Rojali.

“Wong Abah lan Ibu ngêréwék baé ning umahé. Êndas kitané munyêr. Ruwêd. Makané nyulêd bêlêdogan baé sêkalian,” jawab Rojali.

“Rojali pernah janji ning Abah. Lamun nakal maning, janjiné bakal disunat. Sirané kuh wis gêdé. Wis kêlas limê SD. Orê isin tah durung sunat iku. Diajak sunaté gati sing bêngén,” jéréh Kamad.

”Iyê Bah, Rojali ngaku salah. Ko ésuk jaluk ampurê ning Duloh. Tapi, ajê sunat dipit, durung wani,” jéréh Rojali.

”Garan gah ajê nakal kakangé!” Rosyid nyêlêtuk.

”Padê polahé. Sêkalian baé Rosyid disunat. Tanggung wis kêlas loro. Aje pepéluan kakang irê,” jéréh ibuné.

Rojali lan Rosyid padê-padê ngêtungkul. Matané saling ngêlirik. Matê Rojali ngêgéi kodê, endasé ngangguk. Lawang umah kêdêlêng ngêblak ambê. Ing dalêm kodê itungan têlu, Rojali lan Rosyid êmbil ancang-ancang. Sêkaroné ngêgas, mêlayu lêdêd.

2024

_______

Penulis

Encep Abdullah, penulis sing doyan mangan endog.


Kirim naskah
redaksingewiyak@gmail.com